Archive for June, 2016

Zakaat Ke Masaail

Duniya wa aakhirat mein zakaat wa sadqaat ke be shumaar faaide hain, is se maal ki hifaazat hoti hai, insaan aafaton aur museebaton se bach jaata hai aur buri maut se us ki hifaazat hoti hai. Yeh imaan waalon ke liye badi hi khair wa barkat ki cheez hai. Is liye zakaat wa sadqaat ada karte waqt apne dil mein tangi mehsoos na karein aur na use bojh samjhein, balke khush dili se ada karein, jin ko dein un ke saath husne sulook se pesh aayein, taal mataul na karein, chakkar na lagwaayein unhein giri huwi nigaah se na dekhein aur de kar ehsaan na jatlaayein balke un se ehsaan maanne aur shukriya ki ummeed bhi na rakhein. In sab baaton ka lihaaz na karne se saara sawaab barbaad ho jaata hai. Rasoolullah Sallallahu alaihi wasallam ka irshad hai : jab zakaat wusool karne waale tumhaare paas aayein, to un ko raazi khushi kar ke bhejo. [Muslim : 2546, Jareer Raziallahu Anhu] Is liye aap hazraat ke saamne zakaat ke ahkaam wa masaail pesh kiye ja rahe hain, poore dhyaan aur tawajjoh se sunein.

Read More

Ramzaan Ki Taiyyari

Ramzaanul Mubaarak ka maheena Allah Taala ki khusoosi rahmaton aur barkaton ke barasne ka maheena hai, is mein rahmatein aur barkatein mosla dhaar baarish ki tarah barasti rahti hain, saheeh baat to yeh hai ke ham us ki waaqai qadar wa qeemat ka andaaza nahein laga sakte. Mujaddid Alfe Saani R.A. apne maktoobaat mein tahreer farmaate hain:
Ramzaanul Mubaarak ke maheene mein itni barkaton ka nuzool hota hai ke baqiya poore saal ki barkaton ko Ramzaanul Mubaarak ki barkaton ke saath wo nisbat bhi nahein jo qatre ko samandar ke saath hoti hai. Is liye Ramzaanul Mubaarak ka bahot ziyaada ehtimaam karne ki zaroorat hai. Jo cheez jitni ziyaada ahem aur qeemti hoti hai, us ka utna ziyaada ehtimaam bhi kiya jaata hai. Kisi ke yahaan koi badi taqreeb ya function ho to kai maheene pehle se tayyaari ki jaati hai aur uska mansooba banaaya jaata hai, isi tarah ramzaan ki tayyaari ramzaan aane se pehle hona chaahiye, warna sochte sochte maheena yun hi guzar jaayega.

Read More